Imanol Urbieta, Zarautzen jaio zen 1934an. Batez ere haurrei  zuzenduriko musika egiteagatik ezagutu izan bada ere, beste hainbat ekimenetan ere parte hartu izan du bere ibilbide emankorrean: abesbatza eta musika talde askoren sorreran eta zuzendaritzan, haur kantarien mugimendua abiarazten,  Zarauzko ikastolaren lehen urteetan, eta Xirula Mirula musika eskolen sorreran, besteak beste.
Langile nekaezina izan da Imanol Urbieta.
Haur kantariak  izeneko diskoa grabatu zuen 1967an. Orduz geroztik, dozenaka dira argitaratu izan dituen lanak: Haur kantarien birlorak, Xixupika, Jolasmotrizitatea, Psikofonia, Fonemafonia, Haurtxoa, Aiton amonekin kantari…
Eta ehunka sortutako abestiak: Txiki, txiki, txikia, Behin betiko, Bakarrik eta libre, Mac Mikel, Txoria nintzela, Uztaiak gora (Ran Rober Ran), Martuteneko trena, Jon Braun…
Sariak:
-1996an, Zarauzko Kultur Merezimenduaren domina eman zion Zarauzko Udalak.
-2002an, Donostiako Kursaalen, “Imanol Urbieta, lagunak zuri kantari” omenaldia egin zioten hainbat kantari era musikarik.
-2007an, Gipuzkoako Foru Aldundiak  Anton Abbadia saria eman zion bera jardunean euskarari eman dion garrantzia eskertzeko.
2009an Donostiako Orfeoia-UPV/EHU saria jaso zuen, bere bizitza profesional oparo eta emankorrean egindako lana eta ibilbidearengatik.
-2010ean, Argizaiola Saria  eman zioten umeen euskarazko kantutegiari egindako ekarpenagatik.
-2013an Zarauzko Udalaren ekimenez Bakarrik eta libre. Imanol Urbietaren kantak izeneko diskoa argitaratu zen. 14 kantarik Imanolen hainbat  kantu moldatu eta beren erara kantatu zituzten omenaldi moduan.